ياخلق الله .. بطلوا (السياسة) في رمضان ..!

عبدان دهيس

 

بالله عليكم ياخلق الله .. ياناس.. يا أوادم .. هل تقدروا تبطلوا السياسة.. على الاقل في (شهر رمضان )الكريم ..؟ وتخلونا نصوم كما بقية عباد الله .. ونتقرب الى الله .. في هدوء وسكينة وراحة بال .. وعبادة وقرآن .. حرام عليكم .. دوخنا في هذي البلاد من السياسة .. من صبح الله الناس يقولوا .. يافتاح .. يارزاق ياكريم.. ونحنا جلوس في المقاهي ومبارز القات .. وفوق(البوابير) .. وفي الشغل .. وعند نسوانا وحريمنا .. نهرج في السياسة (اربعة وعشرين ) ساعة.. ماشي معانا خبر ثاني الا .. (الأمارات) خرجت .. (الأمارات ) دخلت .. الحزام الأمني.. الشرعية.. قوات النخبة.. الاصلاح .. علي محسن …. طارق .. أحمد علي.. بن دغر.. الوزير الفلاني أستقال .. الوزير العلاني رقد .. وهت لك من هذي الخبابير .. جبتوا لنا الجنان والخجة .. أذكروا الله قليل ياناس .. وصلوا على النبي .. وزيدوا بالصلاة عليه .. وريضوها بالرحمن .. وأتقوا الله في نفوسكم .. عاد الله بيراجعكم .. الناس طلعوا القمر قبل (خمسين سنة) وقدهم يفعلوا تجارب من شان يعرفوا هل بني  آدم يقدر يعيش  على سطح القمر .. وبنوا مدن على حالها تحت البحر في أكثر من بلاد .. ونحنا مكانا جلوس (محلك سر) .. سابطين حيوثنا سبطة .. كما (الوتد) اللي يربطوا فيه الثور .. لا قدمنا قليل .. ولارجعنا لاقفا .. ولا خلينا غيرنا يقدم .. ماشي معانا خبر ثاني الا .. قالت قلتي.. هبيتي جيتي .. ضيعنا نفوسنا في السياسة.. وهبت عمارنا هدر.. ومستقبلنا راح سدى.. وشعرنا (بيض) .. وسنونا فلتوا .. ونهدت ظهورنا .. ودقنا  السكري ومرض القلب والكلى والضغط .. وأمراض الدنيا كلها فينا .. وحالتنا حالة.. ونحنا نطحن السياسة طحين .. والمأساه.. ياريت اننا (بلاد صناعية) .. او عندنا (إكتفاء ذاتي) .. ونستغل ثرواتنا بالعقل بعيد عن السرقة والفساد .. لكننا نشتري كل شي من الخارج .. من الأبرة حقت الخياط  والمسمار (ابو كعكة) .. الى (البابور والطيارة).. حتى النعنع والشكليت والشمنجم (أبو حربة) نستورده  من الصين والهند .. شوه هذي المصيبة .. وشوه عاد باقي معانا في هذي البلاد ..؟ حياتنا كلها سياسة وحشوش .. وهات يا (مشوش) .. وهات يانقاش من داخل قلوبنا وهات يالطم وملطامة .. وياسبوب ..وياعرعار .. ويا (تخوين ) للآخرين .. حتى داخل (الزوالي) نتناقش في السياسة ونتعارك .. هذا اللي نعرف له .. ولو واحد قل لنا .. تعرفوا تخيطوا (السروال ) لا اقتطع ..؟ كلنا بنقول .. (لا) .. نحنا نعرف نحلل ونناقش في (القنوات الفضائية) .. ونخبز في السياسة.. ونصنف الناس .. هاذولا (حراك) .. هاذولا (أخوان) .. هذا (مجلس انتقالي).. هذا (ائتلاف وطني) .. هذا مع (الشرعية).. هذا مع (التحالف) .. هذا مع (السعودية) .. (هادي) تحت الاقامة الجبرية.. (بن دغر ) محاصر.. .. الحوثيين دخلوا .. الحوثيين خرجوا .. المبعوث الأممي ماشي يقدر يجي عدن – الا يقولوا .. بيجي عدن – أيوه .. ايوه بالله عليكم .. شوفوا على كلام صاقع ناقع .. والله يبان دخلنا داخل .. ولا سألنا واحد من (صحاب السياسة) هاذولا .. معاك (سبار حق رمضان ) في بيتك ..؟ بيقل لك .. لا .. طيب معاك (بيس ) مصاريف لعيالك ..؟ بيقل لك .. لا .. طيب عيالك يقروا بالمدرسة .. ؟ بيقل لك ..لا.. طيب  مادام كله .. لا .. لا .. وماشي مع جدات جداتك (بيس) .. ولا معاك (سبار رمضان ).. ولا عيالك يقروا في المدرسة .. شوه دخل جدات جداتك في (السياسة) .. تجي تبا ترقد قليل في بيتك .. قامت (لنسانة) حقتك .. وفتحت (قناة الجزيرة) .. وطيرت النوم من عيونك .. تقوم تصيح فوقها .. زادت وقلعبت (قناة العربية) .. وهات يا (سياسة) وياخبابير .. .. وهات يا نخيط وخبيط الخبيط .. بينا بالبين .. القنوات كلها تلهب لهيب .. وفي الأخير  كله كلام مايسقيك حتى (قلص ماي) .. تقل ( للنسانة حقتك ) .. وراش يا (حرمة) يابت الناس.. ماخليتينا نرقد قليل ..؟ تقل لك .. اسمع .. اسمع .. (الامارتيين ) نعم دخلوا (سقطرة) .. والحوثيين رجعوا (جبل الطيري) .. طيب وين يقع هذا (جبل الطيري) .. و(جبل الحمامة ) و (جبل الدجاجة) ..؟ ياحرمة .. خلي لنا حالنا .. مامعانا حتى (ريال) ولا (بيسة ولا أردي) داخل بيتنا ).. وأنتي جالسة تقلعبي من قناة لا قناة .. عيب عليش شوه هذي من مصيبة جبتها لا داخل بيتي..؟ يعني يامعنى .. حتى بيتك مايخلوا لك حالك فيه  .. كله (سياسة) من صبح الله لما تغيب الشمس.. بعدين أرقد لك جيعان .. مامع جدات جداتك حتى (حق العشا) خلي السياسة تنفعك .. ارحمونا ياناس.. أسألكم بالله .. بطلوا (السياسة) على الأقل في شهر (رمضان الكريم) .. والشرعية مكانيه جالسة .. والتحالف مكانه عندنا .. والانتقالي  جمبنا.. والحراك في الجنوب.. والحوثيين في الشمال .. والحرب مستمرة .. ولا ناقص علينا حاجة .. بس انتوا خلونا نجلس  بلا (سياسة) .. على الأقل لا بعد (رمضان ) .. بعدين لكل حادث حديث .. تصدقوا ياناس واحد صاحبي من حقون الزمان .. كايع من نفسه .. قل لي : يابن دهيس .. تصدق أن لنسانه حقتي تعرف .. تاريخ  كم دخلوا الحوثيين صنعاء .. وتاريخ كم دخلوا عدن .. وتاريخ كم قعت الحرب.. وتاريخ كم انتخبوا (هادي) .. وتاريخ كم وقعت (عاصفة الحزم) .. وتاريخ كم جت الأمارات عدن .. وتاريخ كم تأسس المجلس الأنتقالي.. وتاريخ كم قتلوا علي عبد الله صالح ..؟ والله انها(قاموس كبير) في السياسة – ماشاء الله عليها – حافظة عن ظهر قلب كل التواريخ حقت مصايب السياسة .. لكن لما تقل لها : (تعرفي تخبزي خمير لحجي..؟)  تقل لا .. لا .. يداتي بيحرقوا في (النوفا) .. شوفوا بالله عليكم على كلام .. اصبح أكلنا كله من السوق .. عسى كم بتكون بيسنا .. ؟ ماشي هذا وبس.. حتى لما تقل لها .. شوه اسم زوجش وأسامي عيالش ..؟ تقل لك .. نسيت أساميهم .. لكن في السياسة ولا (قناة الجزيرة) كماها.. شوه هذي من مصيبة .. حتى النسوان حقون زمان .. علموهم السياسة .. طيب وين تبونا عاد نهب ..؟ واحد (بليط) قال : ابتسم انته في اليمن .. ورمضان قده عند الباب .. نفجع عليكم تفطروا (سياسة) وتتسحروا (سياسة) .. ورمضان كريم ..!

قد يعجبك ايضا المزيد من مشاركات الكاتب